“Qarabağın yenidən qurulmasında yol, körpü və tunel tikintilərində istifadə edilən müasir materiallar, mexanizmlər və istifadə qaydaları” üzrə konfrans

Azərbaycan Avtomobil Yolları Dövlət Agentliyi, Azərbaycan Memarlıq və İnşaat Universiteti, “Turquoise” MMC, “Proyapı” MMC şirkətləri, həmçinin Fövqəladə Hallar Nazirliyinin dəstəyi ilə baş tutan konfransda “Tunellərdə və avtodayanacaqlarda havalandırma”, “Aşağıya doğru yamac boyunca mərhələli enmə üsulu ilə 55 metr uzunluğunda körpü aşırımının həyata keçirilməsi, Qarabağ üçün zəlzələyə davamlı bina modeli”, “Avtomobil və dəmiryolu körpülərində yastıq və inşaat tikiş birləşmələri”, “Geoarme divarlar və onların Qarabağın yenidən qurulmasında nümunələri, yol tikintisində innovativ məhsullar” mövzularında məruzələr edilib. Bununla yanaşı, işğaldan azad olunmuş ərazilərdə infrastrukturun bərpası istiqamətində aparılan genişmiqyaslı işlər, layihələr barədə konfrans iştirakçılarına məlumat verilib.

Konfransı açan Azərbaycan Memarlıq və İnşaat Universitetinin rektoru, professor Gülçöhrə Məmmədova çıxışında bu çür konfransların təşkil edilməsinin vacibliyindən, konfransda iştirak edən universitetin professor-müəllim heyətinə və tələbələrə faydalı və praktik məlumatların ötürülməsində böyük rolundan, konfransda çıxış edən tikinti şirkətlərinin nümayəndələri ilə gələcək əməkdaşlıq və təcrübələrin mənimsəməsinin əhəmiyyətini vurğulayıb.

Daha sonra konfansda çıxış edən Dövlət Ekspertiza Baş İdarəsinin rəisi Təyyar Hüseynli bildirib ki, “İşğaldan azad olunan ərazilərdə aparılan yol infrastrukturunun uzunluğu hazırda çoxdur. Onların bəziləri hələ ekspertizaya təqdim olunmayıb. Bunun səbəblərindən biri layihələrin tam şəkildə işlənib qurtarmamasıdır, çünki ərazilərin minalardan təmizlənməsi hala davam edir. Ona görə həmin layihələrin mərhələli şəkildə ekspertiza idarəsinə təqdim olunmasını məqsədəuyğun hesab edirik”.

Konfransda, həmçinin Qarabağda çəkilən yollardan, tunellərdən və körpülərdən bəhs edən videoçarx nümayiş olunub.

Konfransın sonunda “Turquoise” MMC şirkətinin baş direktoru, konfransın əsas təşkilatçısı Ali İhsan Genc bütün iştirakçılara və konfransda çıxış edən şirkət nümayəndələrinə dərin minnətdarlığını bildirərək, bu çür konfransların mütəmadi olaraq təşkil olunmasını, universitet tələbələrinin mövcud layihələrdə iştirak edərək yeni biliklərin əldə edilməsində, işğaldan azad edilən ərazilərimizin bərpası və inkişafına töhfə verəcəklərinə ümidvar olduğunu vurğulayıb.